Poeta: Elicura Chihuailaf sueno azul poema

KALLFV PEWMA MEW
SUEÑO AZUL
Ñi kallfv rukamu choyvn ka ñi tremvn
wigkul mew mvley
wallpaley wallemu, kvñe sause, kamapu
/ aliwen
kvñe pukem chi choz aliwen rvmin tripantvmu kvñe antv allwe kochv ulmo reke
ka tuwaymanefi chillko ta pu pinza
rvf chi kam am trokiwiyiñ, kvñe rupa kvnu
/ mekey!
Pukem wamfiñ ñi tranvn ti pu koyam ti llvfkeñ mew wvzam tripalu
Zum zum nar chi antvmu tripakiyiñ, pu mawvnmu ka millakelv nar chi tromvmu, yeme ketuyiñ ufisha
(kvñekemu gvmañpekefiñ lanmu egvn, weyel kvlerpunmu pu ko egvn)
Pun fey allkvtu keyiñ vl, epew ka fill ramtun inal
/kvtral mew
neyvntu nefiyiñ ti nvmvn kvtral kofke ñi kuku
ka ñi ñuke ka ñi palu Maria
welu ñi chaw egu tañi laku egu -Lonko lechi lof
mew- welu kvme az zuwam pukintu keygu
Pvchikonagen chi zugu nvtram kaken welu
ayekan chi pu kom zugu no
Welu feymu kvme kimlu ti vlkantu trokiwvn
Fillantv pvram niel chi mogen, welu pvchike
makan zugu no
wilvf tripachi kvtral, pu gemu, pu kvwvmu
Lukumu metanieenew ñi kuku allkvken wvne
ti kuyfike zugu tati aliwen egu
ka kura ñi nvtramkaken ta, kulliñ ka ta che egu
Fey kamvten, pikeenew, kimafimi ñi chum
kvnvwken egvn
ka allkvam ti wirarchi zugu allwe ellkawvnmu
kvrvf mew
Ñi ñuke reke wvla, kisu ñvkvfkvlekey, chemu
rume pekan llazkvkelay
Fey pekefiñ ñi wall trekayuwken tuwaykvmekey
ñi kuliw, poftunmu ti lvg kalifisa
Feyti fvw fey kvme pun ga witralkvley
kvme ñimiñ zewkvlerpuy
Ñi pu peñi ka ñi pu lamgen -zoy kvñe rupan
mew- upa kimfuiñ feyti ñiminkvzaw, welu
weza tripan
Welu lonkotukufiñ ñi kimvn feyti ñiminkvzaw
fey zuguley ñi chumgechi ñi ta pu mapuche
ti afkintu newen, ti zeqvñ mew, ti rayen ka
vñvm egvn
Ka tañi laku iñchiw ñoñmen tuwkiyu
kalechi pun mew
Pvtrvkeñma ñvkvf narvn, fvtra nvtram ñi chumgechi ñi wefvn taiñ pu kuyfikeche
feyti wvne mapuche pvllv vtrvf narpalu Kallfv
/ mew
feyti pu wenu am pvltrv lefulu ti afchi wenu
kvrvf mew wagvlen reke
Kimel eyiñmu ta wenu rvpv, ñi pu lewfv
ka ñi pewma
Kvñe pewv pekefiñ ñi pilun yenen rayen ka ñi wente ekull mew
mulugechi pu liwen triltra
namuntu yawvn
Ka tukulpakefiñ kawelltu yawvnmu ragi
mawvn mew, ka fvtrake mawizantu
ragiñ kom kvleche pukem
Allwe trogli ka newen che gekefuy
Nampiawvn ragiñtu ko new, mawizantu ka
tromv egu pekefiñ rupan ta kakerumen
antv tripantv:
Wvtre alof kvyen (pukem), karv pewv kvyen
/ (pewvn)
wvne fvnkun anvmka kvyen (afchi pewv mu
ka epe konpachi walvg mu)
fillem fvnkun anvmka kvyen mew (walug)
ka welu trvflkenvwchi choyvn kvyen (rimv)
Tripan ta ñi chaw ka ñi ñuke inchiñ kintuam lawen ka pvke lawen
Koleu pvtramu kon pelu, waka lawen weñagkvnmu kon pelu
palgin kay fukuñ kon pelu ka allfenmu kon pelu
zenkull kuyagki kon pelu -fey pilerpuy ñi ñuke
Purukeygvn, purukeygvn, tati pu lawen ta mawizantumu -ka pirpuy kisu ñi chaw
femlerpuy witrañ pvramalu reke ti lawen iñche
ñi kvwv mew
Femgechi mu kimfiñ ñi vy ti fillem lawen ka
fillem anvmka
Feyti pvchike piru mvley ñi femal egvn
Chem rume zoykvlelay tvfachi mapu mew
Fey tvfachi afmapun epun trokiñkvley
kvmekelu ta mvley wezakeñma egu ta mvleam
Che ta rumel mogen mapu gelay
Mapuche fey piley mapumu tripachi che piley
-pinerpuenew
Rimvmu ta wilvfi ta witrunko
Feyti ko ñi pvllv negvm mekey wente kachu kuragechi ko mew
feyti ko ge Mapumu weftripa mekey
Fill tripantv lef pvraken ti mawizantumu pemeam ti azel ka mapu lechi chemkvn ñi trawvn mew
Fey ka akuketuy ti pukem mogeltu Mapu petulu
ñi wiñotuam ta weke pewma ka tukatuam
Kvñe kemu tati weraw kimel vrpakeyiñmu ta kutran ka lan
Weñagkvken ta ñi rakizwamvnmu ñi ayin
/fvchakechemu
amualemay rvpvtupeaymay inal Lewfv
/Kvlleñumu
gvtrvm am tati wampofe la yerpapelu
tañi pewputuam ñi kuyfikeche egu
ñi ayiw am ti Kallfv Wenu Mapu mew
Kvñe pu liwen amurumey ñi pvchi peñi Karlu
Wenche mawvnkvley, kagechi trufken
/ antvgey
Tripan ñi ñampuam rakizwam mew ragiñ mawizantumu (petufemyawen feymu)
Witrunko zugun rofvl mekeyiñmu tati rimv
/ antvmu
Fachantv fey pifiñ tañi pu lamgen Rayen egu
ta Amerika:
Feyti vlkantun zugu re kvmv neyv am genozugu trohiwvn mvten, ñi feypieyiñmu taiñ Jorge
/Teillier
Kawelu Wenuñamku reke wall ke mapumu
rulpan ñi weñagkvn rahzwam
Gabi kay Kawi, Malen ka Beti, fey pinerpufiñ
/egvn :
Fewla mvlen pelon kvyen feyti lelfvn mew, Italia mu Gafriele Milli iñchiw mvleyu
Fewla mvlen Franciamu, ñi peñi Arawko iñchiw
Fewla mvlen Sueciamu, Juanito Kameron
inchiw ka Lasse Söderberg
Fewla mvlen Alemania mew ñi kvme ayin wenvi Santo Chaves ka Doris egu
Fewla mvlen Olanda mew, Marga, Gonzalo Millan ka Jimena, Jan ka Aafke, Kata
ka Juan inchiñ
Mawvni, ta fvrfvr mawvn, chozvmi ta kvrvf Amsterzam waria mu
Wilvfi ti witrunko waria mew kuyfike fieru
pelon mew ka feyti lefazisu kuikui mew
Kallfv tuliparay pelu trokiwvn, ka kvñe wigka kuzi feyti mvpvtripakelu ka tvgnagkelu
Kvpa mvpvfuyiñ: Felepe, chemnorume
nepel layanew -piwvn
Fey yelvwvn ti tromv mew kake kim noelchi mapu ñi piwke mew.